ҚАЕУ-не келген Америкалық студенттер әдебиеттанушы — оқытушымен бірге кітап ордамызда қонақта болды.

Арнайы келген шетел жастарын «TechnoSHEBER» 3D инклюзивті орталығы, «COMICS-CLUB», «Менің таңғажайып әлемім» атты мульстудия жәнеСенсорлы Үстелдің жаңашыл жұмыстарымен таныстырдық. «Ана мен Бала» және «Коворкинг»алаңдарын көрсеттік.

«Баба дәстүрі — XXI ғасырда» атты жобамыздың аясында жүзеге асырылған «VR-Киіз Үйімізге»кіргізіп, ұлттық құндылықтарымыз туралы айтып бердік. «Оюлар сөйлейді…», «Бата алыңыздар – Бақ қонады», «Жеті Ата» жұмыстарымен және «Ұлттық Киім – Ұрпаққа Аманат!» атты ұлттық киімдер AR көрмесімен таныстырдық.

Күй шертіп, «Ортеке» биін билетіп, қонақтарға ерекше көңіл күй сыйладық.

Суретшілер Б.Урманчи мен Б.Исиннің жазушы Оралхан Бөкей шығармалары бойынша салған көркем суреттерінің AR-көрмесі және «Өзгерген Өскемен» атты AR-көрмемізді көрсетіп, баяндап бердік.

Ұлтымыздың ұлы данышпаны Абай Құнанбайұлының әдеби мұрасы туралы айтып, Мұхтар Әуезовтің «Абай жолы» роман-эпопеясына арналған «Бір кітап» көрмесін таныстырдық.

Ұлт Ұстазы Ахмет Байтұрсынұлының ағартушылық және қазақ тілі, әдебиеттану ғылымдарының негізін қалаушы бағытындағы қызметі мен «Әліппе» кітабына ерекше тоқталдық.

Осыдан кейін, жас қонақтарымыз «Оралхан Бөкейдің әдеби залында» жазушының өмірі мен шығармашылығына қатысты естелік жәдігерлерді тамашалады. BOKEY.KZ электронды кітапханамызда әдеби мұрасы мен өмірбаянына байланысты мұрағат мәліметтері мен фотосуреттерін көріп, танысты.

Америка жастары көркем әдебиетте өлке тарихы мен мәдениеті туралы жазған Шығыс Қазақстан жазушыларының шығармашылығы туралы білуге де ерекше қызығушылық танытты. Бұл орайда Катонқарағай өлкесінде өмірге келген жазушы-саяхатшы Әлібек Асқардың туған жер мен ел, рухани құндылықтар туралы шығармаларынтаныстырдық. Қонақтарымыздың өтініштеріне орай келесі кезекте Өскеменде балалық шағы өткен жазушы А.Волковтың «Сиқырлы изумруд қаласының сиқыршысы» атты кітаптар топтамасына да тоқталып өттік. Кітапханамызды таныстыруды еліміздің ақын-жазушыларыкітаптарының көрмесімен аяқтадық.

Америка жастарымен болған бұл кездесу халықаралық мәдени сұқбат пен ынтымақтастықтың бір көрінісіндей жан-жақты мазмұнды өтті.