Шекара қызметінің ШҚО бойынша департаменті қызметкерлері кітапханамызда болып, 1941-1945 жылдардағы соғысқа қатысқан қазақ жазушы-ақындардың шығармаларымен танысты. Кітап ордасының кинозалында шекарашы сардарлар мен сарбаздарға майдангер жазушылар жайлы тарихи фильмдер көрсетіліп, олардың өмірбаяндары мен шығармалары жайлы тың деректер айтылды.
Сондай-ақ, оқырмандарға қаруларын қаламға ауыстырған Қ. Қайсенов, Б. Момышұлы, М. Ғабдуллин, І. Есенберлин сынды әдебиетшілердің кітап көрмесі ұйымдастырылды.
Аталмыш шараға шекарашылармен бірге қаламыздың №3 мектебінің оқушылары да қатысып, аталмыш тақырыпта мол мағлұмат алды.
Сонымен қатар, келушілер кітапханамен танысып, көрсетілетін қызметтер жайлы кең танымдық ақпарат берілді.
Қатысушылар бірауыздан ұйымдастырылған іс-шараның, әсіресе, жас шекарашы сарбаздар мен жасөспірімдер үшін тәлімдік-тәрбиелік мәнінің зор болғанын атап өтті.