Оралхан Бөкей атындағы кітапхана жанындағы Интеллектуалды даму орталығында қарт адамдарға арналған папперкрафт бойынша қызықты шығармашылық сабақ ұйымдастырылды. Қағаздан көлемді бұйымдар жасауға арналған бұл кездесу қатысушыларға ерекше қуаныш, жақсы көңіл күй мен шабыт сыйлады.

Сабақ барысында қатысушылар папперкрафт техникасының қыр-сырын меңгеріп, қағазды қию, бүктеу және біріктіру арқылы өз қолдарымен әсем бұйымдар жасады. Алғашында күрделі көрінгенімен, әр қатысушы тапсырманы сәтті орындап, жасаған жұмысына үлкен мақтанышпен қарады.

Сабақтың атмосферасы өте жылы әрі достық сипатта өтті. Қатысушылар бір-біріне қолдау көрсетіп, тәжірибелерімен бөлісіп, ортақ шығармашылық арқылы ерекше қуанышқа бөленді. Көпшілігі мұндай сабақтардың көңіл сергітіп, жан дүниеге тыныштық сыйлайтынын атап өтті.

Осындай іс-шаралар шығармашылықтың жас талғамайтынын тағы бір мәрте дәлелдейді. Шығармашылықпен айналысу ұсақ моториканы, зейінді, қиялды дамытып қана қоймай, эмоционалдық күйді жақсартып, өмірге деген құлшынысты арттырады.

Интеллектуалды даму орталығы алдағы уақытта да қарт адамдарға арналған мазмұнды, пайдалы және шығармашылыққа толы сабақтарды жалғастыра отырып, белсенді әрі мағыналы өмір салтын қолдауды көздейді.